Garchi kattalar oʻrganish bu muayyan bilimlarga ega boʻlish deb hisoblasa-da, bola nuqtayi nazaridan, oʻrganish boshqa narsani anglatadi.

Olti oylikdan keyin chaqaloq yaxshigina suhbatlasha oladi va bu koʻnikmalarni takomillashtirishni, shuningdek, ulardan atrof olamni bilish uchun foydalanishni xohlaydi.

3–6 oyligida chaqaloqlar atrofdagi odamlar bilan faol gaplashishga harakat qiladi, lekin ular boshqalarni suhbatga tortish uchun koʻproq oʻz qiziqishlari va boshqalar bilan muloqot qilish xohishini koʻrsatib berishi kerak.

Siz bilan oʻrnatilgan kuchli hissiy aloqa bolangizning atrof olamni oʻrganishga, tushunishga tayyorligi va jasorati kaliti hisoblanadi. Bu munosabatlar tugʻma boʻlmaydi, ular ota-ona va bolaning birgalikdagi hayotining birinchi daqiqalaridan boshlab rivojlanadi.

Ota-onalar bilan kuchli hissiy rishtalar chaqaloq rivojlanishi uchun asosiy omildir (keyinchalik ham). Agar bola oʻzini xavfsiz va sevimli his qilsa, atrof olamni oʻrganishga tayyor va jasoratli boʻladi. Bu orqali u muloqot qilish, boshqalar bilan munosabat oʻrnatish qobiliyatini, sensomotorika koʻnikmalarini va nutqni rivojlantiradi.

Ota-onalar ittifoqi bu – oila oʻz farzandiga yaxshi gʻamxoʻrlik qilishi uchun zarur boʻlgan kuchli vosita. Bu ota va onani umumiy maqsad atrofida birlashtiradi, yaʼni bolaga gʻamxoʻrlik qilish orqali bola va oilaning farovonligini taʼminlaydi. Garchi bu oʻz-oʻzidan sodir boʻlgandek tuyulsa-da, sifatli ota-ona ittifoqining rivojlanishi uchun koʻp qadamlar tashlanadi.

Boladagi xavfsizlik va himoyalanganlik hissi tarbiyachilar bilan gʻamxoʻr va yaqin munosabatlarga asoslangan. Agar chaqaloq qarab turganida unga tabassum qilsangiz, oʻziga ishonchi sust yoki qoʻrqqan paytida uni qoʻllab-quvvatlasangiz, qiziqishini payqasangiz, keyingi faoliyatlarga ruhlantirsangiz, bola oʻzini xavfsiz his qiladi va dunyoni siz bilan, keyinchalik boshqa muhim odamlar bilan birga oʻrganishga tayyor boʻladi.

Bola hayotining dastlabki kunlaridan boshlab uning xatti-harakatlariga boʻlgan reaksiyangiz bola uchun oʻrganishning muhim manbai hisoblanadi. Shuning uchun boshidanoq ijobiy munosabat bildirishga harakat qiling. Ijobiy eʼtibor bu – siz chaqalogʻingizdan va u bilan boʻlgan munosabatingizdan oladigan iliqlik va mamnunlikni namoyon qilish usuli. Bu bola uchun muhim ruhlantiruvchi omil va yaxshi daldadir.

Hayotining dastlabki bir necha oylarida chaqaloqning siz bilan muloqot qilish (ovoz va teginish orqali) ehtiyoji juda katta boʻladi. Unga javob qaytarish orqali siz yomon odatlarni shakllantirmaysiz, aksincha, chaqaloqqa tanishlik, oldindan bilish hissini berasiz, bu esa uni tinchlantiradi. Agar farzandingizning ehtiyojlariga xotirjam va muntazam javob qaytarsangiz, u xavfsizlikni va oʻziga ishonchni his qiladi va sizga ishonishni boshlaydi.